Plantun de Prouvènço

Pèr coumpara dos planto d'encò nostre

Aegilops biuncialis & Cyperus esculentus

Blad-dóu-diable(-di-lónguis-espino)

Aegilops biuncialis

Poaceae Graminaceae

Àutri noum : Blad-dóu-diable, Blad-de-cougiéu, Trauco-sa.

Noms en français : Égilope à grosses arrêtes, Égilope long de deux pouces.

Descripcioun :
Aquéu blad-dóu-diable, gaire coumun, trachis dins li tepiero seco, lis armas e li culturo. Se destrìo di meno veisino, bonodi sis arèsto proun longo (> 5 cm) e escartado. Apoundèn que i'a dos o tres arèsto à l'espigueto d'en bas e tres arèsto à-n-aquesto d'en aut.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.

Port : Erbo
Taio : 20 à 40 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Aegilops
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 3 cm
Flourido : Printèms

Sòu : Ca (Si)
Autour basso e auto : 0 à 200 m
Aparado : Noun
Abriéu à jun

Liò : Tepiero seco - Ermas - Culturo
Estànci : Termoumediterran à Mesoumediterran
Couroulougi : Mediterrano-Touranièno
Ref. sc. : Aegilops biuncialis Vis., 1842

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.